كل شيء تصميم! – بول راند
الفن يا بني مش حيأكلك عيش- ممكن نعتبر إن دي الجملة الي قالها والد بول راند لأبنه لما شافه عمال يرسم ويصمم وهو لسه صغير كان عنده 3 سنين لما ابوه شافه عمال يعيد رسم الاعلانات التجارية الموجودة في محل والده لكن والده ماكنش يعرف إن ابنه حيكون علامة فارقة في تاريخ تصمم الجرافيك في العالم كله وحيصمم لوجوهات أكبر الشركات في العالم – في عام 1914 في بروكلين بنيويورك اتولد بول راند وكان اسمه الحقيقي بيريتز روزنباوم، اتعلم الفن والتصميم في 3 معاهد مختلفة
كان في لحظة فارقة في حياة بول راند لما قابل المصمم والفنان المجري لازلو موهولي ناجي(1) واللي بعد ماشاف شغل بول راند سأله أن كان بيقرأ ويطلع على كتب النقد الفني وكانت اجابة بول راند “لأ” فرد عليه ناجي ” شيء مثير للشفقة” زلزلت الاجابة دي بول راند وخلته يلتهم كتب النقد الفني والفلسفة وغيرت حياته تماما – بدأ حياته في رسم صور للصحف والمجلات، بعد لما بدء يتشهر قرر أنه يغير اسمه إلى بول راند واللي اصبح هوية وعلامة تجارية له ظلت موجودة لحد دلوقتي
كان بول راند ساعات بيشتغل للفن فقط لدرجة أنه كان بيصمم اغلفة مجلة ديريكشن(2) بدون مقابل مادي لكن بشرط ان تكون له مطلق الحرية في الإخراج الفني للغلاف – في بداية العشرينات من عمره – شهرته في التصميم كانت السبب في انه يكون المدير الفني لعدد من المجلات وكلها بدوام كامل
لوجوهات بول راند كانت من أهم تصميماته – كان إلى جانب قدرته الفنية العالية كان عنده مقدرة اقناعية على شرح ازاي اللوجو اللي حيصممه حيسد احتياجات الشركة ويقدر يعبر عنها ويوصل رسالتها وأن التصميم يعتبر أداة تجارية وترويجية مهمة جدا
لكن مشكلة بول راند انه على الرغم من إنه عمل شركة بأسمه إلا أن اغلب الشغل كان هو اللي بيعمله بنفسه وفي عزلة شبه تامة وده كان اهم سبب في أن بول راند كان له فضل على فن الجرافيك ديزاين لأنه حول العاملين في المجال من فنانين تجاريين إلى مصممين جرافيك وخلى المهنة معروفة ومطلوبة وسمعتها جيدة لأن قبل كده كان الاهتمام مركز على مؤلفى وكاتبي الاعلانات (الكوبي ريتر) لأنهم هما اللي بيكتبوا كلمات الاعلان والتصميم كان بيجي بعد كده
بسبب قدراته الفنية العالية اصبح بول راند استاذا فخريا للتصميم في جامعة ييل إلا أنه استقال في عام 1992 احتجاجا على تعيين المصممة شيلا ليفرانت دي بريتفيل(3) في الجامعة وهي مصممة تنتمي للمدرسة الما بعد حداثية(4) في التصميم وهي مدرسة كان بول راند بيكره شغلها واتجاهتها – قضي اخر ايامه في التصميم وكتابه مذكراته واتوفى عام 1996
1 – Laszlo Moholy Nagy
2 – Direction magazine
3 – Sheila Levrant de Bretteville
4 – postmodernist theory