بول راند … المصمم الرائد

المصمم لويس دانزيجر⁽¹⁾ زميل بول راند قال  (إذا كنت تريد أن تكون جيدًا مثل راند، فلا تنظر إلى ما يفعله، انظروا إلى ما ينظر إليه. )

كان اسلوب بول راند بيعتمد على “تشويه المألوف” عن طريق المزج ما بين الفنون البصرية والتصميمات التجارية وكمان عمل تنويعات لونية مختلفة واستخدام وسائط متعددة في اخراج الفكرة اللي عايزة يقدمها للجمهور  وكان بول راند بيقول “يدرك المرء بسرعة أن البساطة والهندسة هما لغة الخلود والعالمية” علشان كده كان شايف إن التصميم لغة عالمية كل الناس ممكن تفهمها وتتأثر بيها مهما اختلفت ثقافتها – استخدم بول راند المساحة السلبية ⁽²⁾ مع تقليل الكلمات علشان التصميم يتنفس مع دمج الكلمات والصور كأنهم شكل واحد

اعمال بول راند بلغت قمة نضوجها في خمسينات القرن العشرين لما اعتنق الفن التجريدي الأوروبي ⁽³⁾ واللي كان بيتبنى رسم مساحات لونية تبان أنها ثلاثية الأبعاد على اللوحة المسطحة – كمان اتأثر بول رايد بالحداثة الأوربية في التصميم والتي كانت بتتميز بالتجريد وعدم التناسق والحركة في الاعمال الفنية

IBM من أهم اللوجوهات اللي صممها كان اللوجو الشهير لشركة

هو اللي صمم الهوية المؤسسية للشركة ككل وحولها لعلامة تجارية معروفة – كان بيصمم اللوجو والاعلانات ومواد التغليف والمطبوعات والأدوات المكتبية وكل حاجة خاصة بالشركة

 ABC, UPS, Westinghouse, Enron بعد كده صمم شعارات للشركات عملاقة

كانت تصميماته للشركات الأمريكية الكبرى تعتبر من أدوات القوة الناعمة لأمريكا ما بعد الحرب العالمية الثانية وعلى الرغم من كل ده كان ممكن يقبل باسعار اقل مقابل أن يصمم اللي في دماغه لأنه كان دائما بيصمم أكثر من المطلوب علشان يحقق تصوره فقط

في عام 1986 ستيف جوبز طلب من بول راند يصمم لوجو لشركته كان اسمها نيكست ⁽⁴⁾ بعد ما اتطرد من شركة أبل ودفع في اللوجو ده مائة ألف دولار – لما ستيف جوبز طلب يشوف كذا تصور للوجو بول راند رفض وقاله انا حعملك شغل يحل مشكلتك لو عايز كذا تصور للوجو شوف حد غيري وعمل اللوجو ومعاه كتيب من مائة صفحة بيشرح فيه فكرته خطوة بخطوة في تصميم اللوجو – ده خلى ستيف جوبز يقول إن بول راند هو أعظم مصمم جرافيك على سطح الأرض

بول راند كان بيأكد على أن اللوجو بيستمد المعنى بتاعه من جودة المنتج أو الخدمة مش العكس فلو المنتج مش جيد عمر اللوجو ما حيقدر يغير الحقيقة دي – كمان اللوجو الناجح هو اللي حيكون مميز وواضح وعمر الناس ما تنساه – واهم حاجة مش شرط يكون بيصور المنتج بول راند كان بيحبذ إن اللوجو ميصورش المنتج يعني لو شركة بتبيع سيارات مش شرط اللوجو يكون فيه سيارة

بول راند كان لازم لما يصمم لوجو لشركة يشرح للعميل خطوات العمل والطريقة الابداعية في التصميم وازاي اللوجو بيعبر عن المنتج وبيحل مشاكل الشركة وكان بيعتبرها أصعب مرحلة في العمل

البساطة في تصميم اللوجو بتكون نتيجة ثانوية مش شيء أساسي في الشغل لكن نتيجة لفهم المصمم للوجو وقدرته على تقديم فكرة جيدة لأن بول راند كان شايف أن أي تصميم لازم يكون جميل وعملي في نفس الوقت وده اللي كتبه في أول كتبه سنة 1947 اللي اسمه “أفكار حول التصميم” ⁽⁵⁾ وهو كتاب مهم جدا في مجال التصميم

في بعض النصائح المهمة اللي بول راند كان دائما بيديها لمصممين الجرافيك

الاعلان هو تجسيد للشكل والوظيفة والاعلان لازم يكون جميل ومفيد وعملي ويكون كيان واحد متوافق مع بعضه

الالهام موجود في كل شيء وأي شيء حولنا المهم إن المصمم يجمع أكبر قدر ممكن من المشاهد سواء الحقيقية أو الخيالية اللي بيشوفها كل يوم

الكوميديا في الاعلان أمر مهم جدا وجيد في أخراج الفكرة الاعلانية

حاول متقدمش تنازلات في الشغل

كن نفسك

 تقبل النقد لأن ساعات العمل الي بيترفض بيكون العميل فيه على حق

حاول توصل لصانع القرار أو العميل الرئيسي وابعد عن الصف التاني والتالت لأن القرار الفعلي حيكون في إيده هو

خليك شجاع ومتخفش

1 – Louis Danziger

2 – Negative space, also known as whitespace

3 – European abstract art

4 – NeXT

5 – Thoughts on Design