“أريد فقط أن أصنع أشياء جميلة ، حتى لو لم يكن أحد يهتم” شاول باس
بوستر الفيلم هو أول حاجة بتشد عين الجمهور بعد (اعلان الفيلم طبعا، لأن الصورة المتحركة لها سحرها) لأنه بيدى الانطباع الأول للفيلم البوستر يعتبر ملخص شديد الإيجاز للفيلم، أو الفكرة العامة عن موضوع العمل، وكما بيثير اهتمام الجمهور. من غيره الجمهور حيبقى محتار مش عارف حاجة عن اي حاجة، وحيفقد الاهتمام وممكن ميعرفش إن في عمل نزل، لأنه مش مجرد ملصق دعائي فقط. وتصميم بوستر الفيلم بشكل صحيح ومتوازن يبين الفكرة العامة للفيلم بشكل جيد، هو تحدي حقيقي لأي مصمم جرافيك. لإن نقص عنصر أو عناصر من التصميم ممكن تسبب تشويش كبير في عقل الجمهور، وده شيء مش المفروض يحصل. شاول باس شخصية لها تاريخ مؤثر جدا في عالم الجرافيك ديزين، استمر لحوالي 40 سنة متواصلة من النجاح. شاول باس كان مصمم جرافي ومصمم بوسترات، ومصمم تترات افلام، ومصمم لوجو وهويات الشركات، ومخرج ومونتير وحاجات كتير قوي، حتى ان انه اطلق عليه “بيكاسو الفنانين التجاريين“. اشتغل مع كبار مخرجين هوليوود، زي هيتشكوك وكوبريك وسكورسيزي، ويكفي نظرة واحدة على موقعه على قاعدة بيانات الأفلام على الإنترنت(1) علشان تشوف كم الافلام اللي صمم تتراتها أو عمل بوستراتها أو شارك في الانيميش بتاعها. شاول باس اتولد في برونكس – نيويورك عام 1920، واتعلم الفن على يد الرسام المجري جيورجي كيبس(2) اللي كان له تأثير كبير على أسلوب شاول باس بعدين.
بدء مسيرته الفنية في الخمسينات من القرن العشرين، خاصة لما المخرج أوتو بريمنجر(3)، طلب منه يصمم بوستر وتترات فيلم كارمن جونز(4)، بعد كده عمل شاول باس تتر فيلم الرجل ذو الذراع الذهبية(5) لنفس المخرج السابق، وهنا حنلاقي شاول باس عمل تتر عبارة عن أسطر بيضاء غير منتظمة عماله تطلع وتنزل، واسماء المشتركين في الفيلم بتظهر حوليها لحد الأخر لما بتظهر يد عايزة تمسك الاسطر دي، في التتر ده كان بيرمز بالاسطر دي لأسطر الهيروين اللي بيدمنها المدمنين واليد اللي عايزة تمسكها يد بطل الفيلم المدمن اللي عايز يبطل الادمان. بعد كده انطلق باس في تصميم البوسترات وتترات الافلام بقوة، كان شغله بيعتمد على المزج مابين شغل عدد من المدارس زي مدرسة دي ستايل(6) وهي مدرسة هولندية اتأسست عام 1917 تمزج الفن بالهندسة المعمارية (الرسومات بتاعتها عبارة عن مكعبات ومربعات ومستطيلات كتير). ومدرسة البنائية الروسية(7)، وهي حركة فنية روسية ظهرت عام 1915 كان هدفها أن تكون مراية عاكسة للمجتمع الاشتراكي الصناعي المتحضر. وكمان مدرسة الباوهاوس(8) وهي مدرسة فنية المانية ظهرت عام 1919وهي مدرسة برده ذات اسلوب هندسي في التعبير. كمان كان عنده قدرة وفهم عالي لكيفية استخدام الألوان، والتيبوغرافي والفضاء السلبي ومن قدرته وتمكنه من الفن كانت في افلام التتر بتاعها أفضل من الفيلم نفسه.
كان شاول باس بيقول دائما أن تتر الفيلم عو عبارة عن “محاولة الوصول إلى عبارة مرئية بسيطة تخبرك بما يدور حوله الفيلم وتثير جوهر القصة“. ” وهو محاولة أن يجعل الشيء العادي حدث غير عادي”. في عام 1968 حصل شاول باس على جائزة الأوسكار، أفضل فيلم وثائقي(9). مش بس كده، باس هو اللي أخرج مشهد القتل في فيلم نفوس معقدة(10) بتاع هيتشكوك(11)، رسم الستوري بورد بتاع المشهد واشرف على الاخراج والمشهد ده بالذات ايقوني جدا. باس وقتها كان مستشار فني للفيلم. بوسترات شاول كانت علامة فارقة في تصميم البوستر، لأن قبله (وللأسف مازال) بوستر الفيلم عبارة عن صور الشخصيات الرئيسية في الفيلم فقط. أو مشهد مميز للفيلم. لكن شاول باس، انطلق من فكرة الرمزية في اختيار تصميم البوسترات، كل البوسترات الخاصة بيه كانت عبارة عن رسومات رمزية بتخليك تفكر في يا تري الفيلم ده بيتكلم عن ايه. في عام 1974 اخرج شاول باس فيلمه الوحيد “المرحلة الرابعة”(12) وهو فيلم خيال علمي سيريالي. مستوحى من قصة أمبراطورية النمل(13) لكاتب الخيال العلمي هربرت جورج ويلز(14). بعد كده ركز شاول باس جهوده على تطوير العلامات التجارية، صمم مجموعة مميزة من الوجوهات الشهيرة، ولوجوهاته كان عمرها طويل يعني الشركات قعدت فترات طويلة (سنين حرفيا) معتمدة الشعار اللي صممه. عمل هويات شركات زي شوفان كويكرز وورنر بروز والخطوط المتحدة وكلينيكس وغيرها كتير جدا. وقال عن العلامة التجارية “العلامات التجارية عادة ما تكون نوع من انواع الاستعارات بشكل أوبآخر. وبمفهوم معين،هي محاولة تحويل التفكير لشيء مرئيًا.” عاش شاول باس كمصمم جرافيك، وكان مصدر إلهام لعدد كبيرمن مصمميين الجرافيك في العالم كله، كان دائما بيوجه شباب المصممن إلى أنهم لازما يعيدوا التفكير في القواعد، يعني مش لمجرد أن طريقة تصميم شغالة وماشية تمام حتى لو كانت مظبوطة يبقى نستمر بيها، لأنها حتبقى مملة ساعتها، لازم نعيد التفكير دائما وبشكل مستمر في القواعد دي. توفي بسبب مرض السرطان في لوس أنجلوس عام 1996، وكان عمره حوالي 75 عامًا.
(1) https://www.imdb.com/name/nm0000866/
(2) György Kepes
(3) Otto Preminger
(4) Carmen Jones – https://www.imdb.com/title/tt0046828/
(5) The Man with the Golden Arm – https://www.imdb.com/title/tt0048347/?ref_=nm_flmg_dr_19
(6) De Stijl (Neoplasticism)
(7) Russian Constructivism
(8) Bauhaus
(9) Why Man Creates – https://www.imdb.com/title/tt0063804/
(10) Psycho – https://www.imdb.com/title/tt0054215/
(11) Hitchcock
(12) Phase IV – https://www.imdb.com/title/tt0070531/
(13) Empire of the Ants
(14) H. G. Wells