في دروس مهمة نقدر نستفاد منها في مجال التصميم من أعمال وحياة شاول باس، في المقال ده حنتكلم عن اهم الحاجات دي
المدراس الفنية وتاريخ الفن: دراسة تاريخ الفن والمدارس الفنية من أهم الحاجات في مجال تصميم الجرافيك، لأن الموضوع مش مجرد شوية حواديت قديمة عن الحركات والفنانين والمدرسة دي بتتميز بأيه والفنان ده اسلوبه ايه، لا ، الموضوع اعمق من كده، دراسة الحركات والمدارس الفنية من أهم مصادر الإلهام للمصمم، لأنه بيديه نبع لا ينضب من الأفكار ممكن يستخدمها في تصميماته، تاريخ الفن منذ بداية العصور الحجرية ولحد دلوقتي تأثيره ممتد ولا ينتهي، حتى لو انت مشعرتش بتأثيره ده، ابحث وفتش ودور في مدارس وحركات الفن وانت تقدر تلاقي افكار كتير تنفع أنك توظفها في تصميماتك.
اللون: كل بوسترات شاول باس كانت بتستخدم ألوان بسيطة جدا، في الغالب لونين وممكن لون تالت، الابيض والاسود أساسي ومعاهم لون تالت. وساعات حتلاقي لون واحد لكن بدرجاته المختلفة. كان شاول باس من محبي المونكروماتك ديزين قوي. استخدامه للون كان بهدف أنه يكون ملفت للنظر ودي أهم حاجة في التصميمات، لأن الجمهور أول حاجة بيتفعلوا معها اللون، اللون له سحر خاص ومؤثر جدا على البشر.
الرسم: من أهم النصائح اللي قالها كان شاول باس بيأكد عليها، “تعلم الرسم”. قال مرة في لقاء “يمكنك الاستمرار دون معرفة كيفية الرسم، ولكن عندما تدرك أنك لا تعرف كيف ترسم، فلن تكون قادرًا على التعلم أبدًا”. كان مؤمن جدا بفكرة إن اسرع طريقة لأنشاء الافكار هو قلم وورقة وارسم بأيدك، كانت رسومات شاول باس كلها عبارة عن لون واحد سيلويت، تكاد تكون خالية من التفاصيل. كان عايز الجمهور يركز في الفكرة وميشغلش باله بالتفاصيل علشان ده يجبر الجمهور على التفكير في الفيلم وموضوعه.
التيبوغرافي: كان اسلوب شاول باس مميز جدا في التعامل مع الخطوط والحروف، دائما الحروف كبيرة و ومرسومة باليد، كانت حروف شكلها قوي وخشن، علشان تعرف توصل الرسالة اللي هو عايز يوصلها. و زي ما كان بيتعمل مع عناصر التصميم التانية كان بيحب أن الخطوط تكون حية ومعبرة عن فكرة العمل.
المساحة السلبية: اكتر حاجة كان شاول باس بيستخدمها هي المساحة السلبية، كان هدفه من استخدامها أن البوستر مايكونش زحمة، ويكون فعال بشكل كبيير، علشان الفكرة توصل بكل سهولة.
البساطة: أهم حاجة كانت في تصميمات شاول باس أنها كانت بسيطة، عدد قليل من الالوان، مع التركيز على صورة واحدة لحدث ما وبزاوية رسم معينة. مافيش تشويش في التصميم، في تركيز على الفكرة وموضع الفيلم.
الجمال: في كمان حاجة مهمة بيأكد عليها شاول باس رغم إن ناس كتير بتنساها، وهي الجمال، التصميم لازم يكون جميل، الجماليات هي مشكلة المصمم الكبرى. لأنه في المقام الأول هو لازم يوصل الرسالة الإعلانية بطريقة صحيحة ومفهومة وواضحة وبدوس أي التباس، لكن لازم تكون جميلة من الناحية الفنية، وإلا فقدت الجزء الأهم من تأثيرها. علشان كده كان بيشتغل كتير جدا على ما يوصل للفكرة بتاعته، ففي فيلم اشراق(1) بتاع كوبريك، عمل 300 تصميم للبوستر لحد ما وصل للتصميم اللي هو عايزه.
حول الحاجة العادية لحاجة غير عادية: شاول باس قال مرة “تعامل مع الأشياء العادية، الأشياء التي نعرفها جيدًا لدرجة أننا توقفنا عن رؤيتها، تعامل معهم بطريقة تسمح لنا بفهمها من جديد، بمعنى جعل الأمور العادية غير عادية “. يعني ايه الكلام ده، يعني أنك كمصمم لازم تبتدي تشوف الدنيا حوليك بشكل مختلف، كأنك بتشوفها لأول مرة، الحاجات العادية جدا ممكن يطلع منها افكار مذهلة، لو بس شوفتها بشكل تاني، أو فكرت فيها بأسلوب تاني. أحداث يومية بنشوفها كل يوم ممكن تتحول مع خيالك لأمور مبدعة، ناس ماشية في الشارع واحد مستنى المواصلات، اتنين بيتكلموا مع بعض، ولاد بتلعب كرة، قط بيدور على أكل، أي حاجة ممكن تتحول إلى حاجة تانية خالص نقدر نستخدمها في توصيل الفكرة.
الثقافة والاطلاع العام: مهم جدا أن المصمم يكون مطلع على مختلف التخصصات، ده حيكون مصدر مهم وملهم جدا للأفكار وطريقة صياغتها.
دي كانت أهم الحاجات اللي ميزت اسلوب شاول باس في التصميم، واللي بتدينا فكرة عن أزاي الحاجات دي قدر من خلالها شاول باس إنه يقدم تصميمات قدرت تعيش لحد دلوقتي.
The Shining – https://www.imdb.com/title/tt0081505/